لە خۆم نامۆ

 

من سەرقافڵەی کچانی پاییزبردەڵەی نیشتمانێکم

ئەوەی لێم ون بووە ، ئەشقە و

ئەوەی لێم تێک چووە ، ناونیشانی پەنجەکانن

لە چاوترووکانی ئاسکە سرکەکانی پێدەشتی ئاسمان دا

دەبمە شەوارەی سوێی خەیاڵێکی یاخی و

لە خشپەی ئەم خەزەڵوەرە دا

گەڵا گەڵا هەنیسکی زەردم ...

خۆزگە بتزانیایە تۆ چ نیشتمانێکی و

من کچە گەڕۆکی لانەوازی بێ وڵات ...

گەر گوڵپەڕی تەڕی حەزت

بە هاڵاوی پەنجەم خۆ کۆ بکاتەوە ،

تاڵ

تاڵ

چاوەڕوانی لە ڕۆحم دەرئەکێشم و

ئەسپێرم کزە با هەڵمپروێنێ و

باویلکەکان لەم وڵاتەم دوور کەنەوە

کە چیتر دەستی خەیاڵت نەمگاتێ...!

٢٦/٨/١٣٩٠