وەریوم
وەریوم
لە ڕووتی جەستەمدا
وەک هاڵاوی ودمی هەناسەیەک
بە ئاوێنەی تەمەننایەکەوە
ئەبمە تەم و
پڕ ئەبم لە سکاڵای
(گەر شەرم قولاپەی خولیام بەردا) ماچ و
(گەر بەری نەدا)، سێ خاڵ ... !
کە تۆ ناسکترین کارەسات بی ،
من گوناحترین فرمێسکی سەرگۆنای حەسرەتێکم و
بەزەییم دێ بە لاوەتییەک
کە لە ڕاستەی شەقامی وەرزی غەمگین
هەر هەناسەی سارد و خشپەی زەرد و
شەوە بارانیش ، خەیاڵم پەلکێشی
حەوتەمین قاتی بێتاقی بێ تاقەتی ئاسمان ئەکا .
لە ژووری من تا ئەو پەڕی شەقامی بوونت
مەودایە چەند گەڵا و
نامە و
پرووشە ماچ و
قەتم مەودای خشپە و وشە بە لێو نەبڕیوە
پەپوولە لە دڵما تینووە ،
چەکەرەی نیگات لە چاوما سەوز نابێ و
کە نازانم
بەکرەی میرگەوەرت بۆ لە سێدارەی کام متمانە بەم ،
تکایە ، تۆ لێم مەپرسە :
"خانم نازت بە چەندی؟"
25/7/90
